الفرق بين الماكرو إنفلونسر والمايكرو إنفلونسر

في وقتنا الحالي، التسويق بالمؤثرين بقى واحد من أهم الأدوات اللي الشركات بتستخدمها علشان توصل لعملائها بطريقة قريبة وشخصية. بس لما بتيجي تبدأ… بتقف قدام سؤال مهم جدًا:
هل أشتغل مع المايكرو إنفلونسر عنده 10,000 متابع؟ ولا أروح لـ ماكرو إنفلونسر عنده نص مليون متابع أو أكتر؟ خليني أوضحلك الفرق بينهم… ومن خلاله نقدر نقرر مين فيهم مناسب للبيزنس بتاعك

أولًا: مين هو المايكرو ومين هو الماكرو؟

• المايكرو إنفلونسر: ده شخص عدد متابعينه بيكون تقريبًا من 1,000 لحد 100,000.
  غالبًا بيكون متخصص في نيتش معين (زي الطبخ، الميكب، التكنولوجيا…)، ومتفاعل جدًا مع جمهوره.

• الماكرو إنفلونسر:
  ده عنده عدد ضخم من المتابعين، ممكن يوصل لمئات الآلاف أو حتى الملايين.
  وبيكون مشهور أكتر، بس في نفس الوقت ممكن يكون التواصل بينه وبين الجمهور أقل شوية.

الماكرو إنفلونسر ثانيًا: نسبة التفاعل؟ مين أقوى؟

من الملاحظ جدًا إن المايكرو إنفلونسر غالبًا بيكون عنده نسبة تفاعل أعلى.
وده لإن الجمهور بيشوفه كشخص قريب، مش نجم بعيد.
يعني لو نزل بوست، الناس بترد وبتتفاعل وبتثق في رأيه بشكل كبير.

أما من ناحية تانية، الماكرو إنفلونسر عنده جمهور كبير، بس التفاعل أحيانًا بيكون أقل نسبيًا.
مش لأنهم مش مؤثرين، بالعكس، بس لإن الناس بتشوفهم كـ “مشاهير”، مش كأصحاب.

ثالثًا: التكلفة؟

ومن هنا ندخل على نقطة حساسة: الفلوس!
لو انت بيزنس صغير أو متوسط، فـ المايكرو إنفلونسر هيكون مناسب جدًا لميزانيتك.
سعره بيكون أقل، وفي نفس الوقت ممكن تشتغل مع أكتر من واحد وتغطي شريحة أكبر من الجمهور.

أما الماكرو إنفلونسر، فتكلفته أعلى طبعًا، لأنه بيشتغل مع علامات تجارية كبيرة، وبيدّي وُجهة ضخمة لأي حملة بيشارك فيها.

رابعًا: مدى التأثير على قرارات الشراء؟

المفاجأة هنا إن المايكرو إنفلونسر بيكون تأثيره أقوى في تحفيز الجمهور على الشراء.
وده لإن الناس بتثق فيه، وبيحسوا إنه جرب الحاجة بنفسه.
بينما الماكرو بيدي تأثير أقرب للبرستيج والصورة الكبيرة للعلامة التجارية.

بمعنى تاني:

• لو عايز تبني ثقة وتبيع بسرعة → روح للمايكرو.

• لو عايز تعمل براندينج وتوسع اسمك بقوة → روح للماكرو.

طب يعني في الآخر، أختار مين؟

الحقيقة مفيش إجابة واحدة تنفع لكل الناس، بس خليني أقولك:

• لو انت لسه بادئ أو عندك بيزنس صغير وعايز تبيع أكتر:
  اشتغل مع 3 أو 4 مايكرو إنفلونسر، ووزّع الحملة عليهم.

• لو عندك براند معروف وعايز تكبر في السوق أو تدخل سوق جديد:
  الماكرو إنفلونسر هيكون مناسب، وهيساعدك توصل لجمهور ضخم بسرعة.

• كمان، ممكن تعمل مزيج بين الاتنين!
  يعني حملة فيها ماكرو بيبني البرستيج، ومعاه مايكرو بيكلم الناس على مستوى شخصي.

الاختيار بين المايكرو إنفلونسر والماكروإنفلونسر مش بس على حسب عدد المتابعين، لكن كمان على حسب هدفك، نوع جمهورك، وميزانيتك.
كل ما كنت واضح في رؤيتك، كل ما قدرت تختار المؤثر الصح لحملتك.